Alla Itolae Nusa 30
Kena Rahela iselu be iruele kwetele mo hoko laleije mise kai Lea mo, hoko ibeteke loko Yakupe be, “Aono au supu kwetele mo hoko au mata neka.”
Eleki Yakupe inasuke Rahela hoko ibeteke lokoi be, “Au meije Alla mo. Ile pine Iono aruele kwetele more.”
Rahela ibeteke be, “Meije Bilha auku tamata makerike, antulu kaini leke iruele kwetele ete au. Leke bauni au ono inate.”
Iriluke Bilha, tamata makerike mere ete Yakupe kena eni bina eleki intulu kaini.
Eleki Bilha ikeu blulu eleki iruele kwete mokwai ete Yakupe.
Rahela ibeteke be, “Alla Iteu pakala kena auku misete. Ilene au kotie lokoIje kai Iriluke kwete mokwai ete au.” Hoko iono kwetele mere eni nane Dane.
Eleki Bilha ikeu blulu suike hoko iruele kwete mokwai suike ete Yakupe.
Rahela ibeteke be, “Au atula titinai kena lesi auku kwalikue eleki au lesi.” Hoko iono kwetele mere eni nane Naptali.
Eleki kena Lea iselu be iruele kwetele moneka hoko iriluke Silpa, eni tamata makerike ete Yakupe kena eni bina.
Eleki Silpa irue le kwete mokwai ete Yakupe.
Lea ibeteke be, “Au supu untune.” Hoko iono kwetele mere eni nane Gate.
Kai Silpa iruele kwete mokwai sae ete Yakupe leneka.
Hoko Lea ibeteke be, “Lalekue ndina kuate. Bei meije bina maketa esi beteke be lalekue ndina.” Hoko iono kwetele mere eni nane Asere.
Eleki kena rebai sae me maka ulu gandume talei, Rubena ikeu eleki itetue tnanele obate sae esi buai eleki ileukele ete inai Lea. Eleki Rahela ibeteke loko Lea be, “Riluke bei tnanele obate rebe amu anare isupure ete au noma.”
Lea ibeteke loko Rahela be, “Arana auku mokwaije pende. Meije aono kena rana tnanele obate rebe auku anare isupure leneka.” Rahela ibeteke be, “Sepo ariluke tnanele obate rebe amu anare isupure ete au hoko antulu kai Yakupe petu meije.”
Eleki kena kmaure Yakupe ileu bei me ndinu, Lea ikeu lokoi kai ibeteke be, “Antulu kai au petu meije le au seli ale peneka kena tnanele rebe auku anare isupure.” Eleki Yakupe intulu kai Lea petu mere.
Alla Ilene Lea ikotie lokoIje hoko ikeu blulu eleki iruele kwete mokwai ete Yakupe. Kwete mokwai mere kena sie limaya rebe Lea iruelesie.
Lea ibeteke be, “Au supu gaji bei Alla le au riluke Silpa ete auku mokwaije pe.” Hoko iono kwetele mere eni nane Isakare.
Eleki Lea ikeu blulu suike kai iruele kwete mokwai ete Yakupe. Kwete mokwai mere kena sie nea rebe Lea iruelesie.
Lea ibeteke be, “Alla Iriluke hadia misete titinai ete au. Bei meije auku mokwai iholmate au le au ruele kwete mokwaia sie nea.” Hoko iono kwetele mere eni nane Sebulone.
Eleki Lea iruele kwete bina sae hoko iono eni nane Dina.
Eleki Alla Inete loko Rahela, Alla Ilene loko ikotie lokoIje hoko ikeu blublulu yele.
Rahela ikeu blublulu eleki iruele kwete mokwai hoko ibeteke be,
“Alla iono au laleku ndina hoko au asomi moneka.”
Eleki iono kwetele mere eni nane Yusupe kai ibeteke be,“TUHANE Atapa au kena kwete mokwai esa lekwe!”
Kena Rahela iruele Yusupe pela, Yakupe ibeteke loko Labane be, “Memete, asuka le au leke au leu loko auku kotare noma.
Asebeie au keri auku binaru kai auku anaru. Au supuise au kerike ete memete ale. Kai arekwa be au kerike ktili titinai ete ale peneka.”
Labane ibeteke lokoi be, “Memete, alene mina, Au supu nau be bei ale pine TUHANE Iriluke misete etekue meije.
Abeteke ete au be au seli saisa ete alere.”
Yakupe iombe, “Memete, arekwa be au kerike etemu ktili titinai peneka kai memete amu binatane pialaru boka peneka le bei au rakaule.
Le kena au luake menai lomeije amu taneiaru boka mosa po meije boka titinai peneka le TUHANE Iriluke misete ete ale le bei au rue ete meije. Hoko kena meije au kerike ete auku lumatoine noma.”
Labane ibeteke be, “Hoko au riluke saisa ete memete ale?” Yakupe iombe, “Memete, ariluke sasaisa ete au moneka. Au suka raka memete amu pipiaru kai dombaru rame, mabe asuka au kotie beimu meije be:
Petu meije au keu loko memeta amu pipiaru kai dombaru, au rana domba anai rebe metene kai pipi anai maklikate leke uleue au.
Tatike pine kena memeta aselu auku pipi kai dombaru, kena mere arekwa be au lepare tinai pibe mo. Sepo memeta aselu pipi kai domba rebe au ranare pine emete pise maklika mo hoko memeta arekwa be mere au ndeaele.”
Labane iombe, “Yele, memete ite ono lulu amu lepate mere.”
Po kena petu mere neka Labane ilupuke pusue pipi tulene rebe maklika kai pipi inai rebe maklika pise oto puputilaru kai pusue domba rebe metene eleki iriluke pusulu ete eni nanaru leke esi rakae.
Eleki eni nanaru esi keri binatana meru lau bei Yakupe. Esi lauke, keu petua telu. Yo Labane eni pipi kai domba lesinaru Yakupe ipialaelu.
Eleki Yakupe irana ai sanai matana bei ai haware, ai badame kai ai berangane. Ilisi bei esi usaiju leke selue maklika.
Itolae ai sanai meru me pipi kai dombaru esi otoi maka kinure esi laleije le kena uluake kinu kwelere usuka asa lomai.
Kena pipiaru uasa lomai tehaike ai sanai maklikata meru hoko esi anaiju maklika, lakue pise oto putile kai metene toha lomai.
Eleki Yakupe irana dombaru eleki ionolu balale kambina rebe maklika kai metene. Isupu binatane eteije iono ele mere kai itebilu bei Labane eni binatanaru.
Kena binatana rebe ktiline uasa lomai hoko Yakupe itolae ai sanai meru me esi otoi maka kinure esi laleije panuhu esi oaiju.
Po kena binatana rebe uktili more uasa lomaije itolae ai sanai meru mo. Hoko pusue binatana rebe putilaru mere uktili mo, meru uleue Labane, eleyo binatana rebe metene, maklikate kai rebe otoi puti kai metene toha lomaije uktili, meru uleue Yakupe.
Ele mere hoko Yakupe eni taneiaru boka. Eni pipiaru, dombaru, keledai kai unta bokala kai tamata makerika boka lekwe.